Матлубахон Сатториён, вазири фарҳанг овозаҳо дар бораи ҷамъ омадани ҳамаи театрҳои пойтахт дар таркиби Театри миллиро рад карда, гуфт, ки Театри миллӣ аз дигар театрҳо пурра ҷудо аст.
Сатториён зимни нишасти хабарии имрӯз гуфт, ки Театри миллӣ дар назди Дастгоҳи иҷроияи раисҷумҳур таъсис дода шудааст ва фаъолияташ ҷудогона ба роҳ монда мешавад.
“Ин театр (манзур Театри миллӣ, – АП) ба Театри Лоҳутӣ, Театри русии ба номи Маяковский ё театрҳои дигар рабт надорад. Онҳо театрҳои алоҳида ҳастанд”, – гуфт вазири фарҳанг.
Мирзоолим Саидов, сардори Раёсати санъати ин вазорат ҳам афзуд, ки дар мавриди ҳамаи театрҳои пойтахт, ба вижа Театри Лоҳутиро дар таркиби Театри миллӣ ҷой додан “ягон дастур дода нашудааст”.
Вазири фарҳанг ва сардори Раёсати санъати ин вазорат гуфтанд, ки бинои Театри миллӣ дар моварои ҷашни 35-солагии истиқлол ва бинои Театри русии ба номи Владимир Маяковский оғози соли 2027 ба истифода дода мешаванд.
ИЗОБРАЖЕНИЕ Бинои Театри миллӣ дар ҳоли сохтмон, 18 январи соли 2026
Бояд гуфт, миёни ҳунармандон ҳарфу ҳадисҳое буд, ки пас аз ба истифода додани бинои нави Театри миллӣ ҳамаи театрҳо дар як бино ҷамъ оварда мешаванд. Ҳунарпешаҳои шинохтаи тоҷик аз ин сару садоҳо изҳори нигаронӣ доштанд.
Аз ҷумла, Қурбони Собир, Ҳунарпешаи халқии Тоҷикистон дар сӯҳбат бо “Азия-Плюс” гуфта буд, “ҳамаи театрҳои пойтахтро дар бинои Театри миллӣ ҷамъ овардан, агар рост бошад, кори дуруст нест. Ин боиси рукуди санъати театрӣ мешавад”.
Аз ин пеш Убайдулло Раҷабов, Ҳунарпешаи халқии Тоҷикистон ҳам дар мусоҳибае бо мо дар мавриди ҳамаи театрҳоро дар як бино ҷамъ овардан ҳам изҳори нигаронӣ карда буд.
“Ҷамъ овардани ҳамаи театрҳо дар як бино бузургтарин ҷурм аст. Ҳамаи театрҳо, ки дар як ҷо ҷамъ шуданд, дигар рақобати эҷодӣ мемирад ва ба дигаршавии вазъ умеде намемонад”, – гуфта буд ҳунарпешаи фақид.
Бояд гуфт, ки рӯзи 1-уми декабри соли 2025 дар Тоҷикистон театри комилан нав – Театри миллӣ таъсис ва рӯзи 7-уми январи соли 2026 аввалин роҳбари он Манучеҳр Шарифзода таъйин шуд.
Сохтмони бинои Театри миллӣ то ҳол он идома дорад. Эмомалӣ Раҳмон Кумитаи давлатии сармоягузорӣ ва идораи амволро масъул кард, ки то ба истифода додани бинои Театри миллӣ ҳайати онро муваққатан бо бино таъмин кунад. Бо гузашти қариб ду моҳ, то кунун маълум нест, ки ба Театри миллӣ бинои муваққатӣ дода шудааст ё на.
Хишти аввали бинои Театри миллӣ соли 2015 гузошта шуда, дар ин миён, соли 2017 сохтмони ин бино бо сабаби ҷой доштани мушкилиҳои молӣ боздошта шуд. Моҳи июли соли 2024 сохтмони Театр аз нав оғоз шуд ва то кунун сохтмонаш ба итмом нарасидааст.
“Азия-Плюс” чанде пеш Оинномаи Театри миллиро дарёфт кард ва бо ҷузъиёти он ошно шуд. Дар ин матлаб перомуни мақсади таъсис ва вазифаҳои Театри миллӣ маълумоти комил пайдо кунед.
