Душанбе. 24-уми феврал. ОИ «Азия-Плюс» – Ба Тоҷикистон миқдори аввали тухмии гандуми дастрасшуда дар вилояти Краснодари Русия аз ҷониби Бонки исломии рушд ворид гашт.
Тавре аз Вазорати кишоварзии ҷумҳурӣ ба ОИ «Азия-Плюс» хабар доданд, беш аз 490 тонна тухмии гандум чун кӯмаки башардӯстона ба бахши кишоварзии ҷумҳурӣ дар чаҳорчӯбаи Ёддошти имзошуда миёни Вазорати рушди иқтисод ва савдои кишвар ва Бонки исломии рушд дастрас гардиданд.
Бино ба иттилои манбаъ, тибқи Ёддошт бонк вазоратро бо 1 ҳазору 300 тонна тухмии гандум, ки бо маблағҳои бонк дар Русия харидорӣ шуданд, таъмин месозад. Миқдори аввалини тухмӣ, ки барои кишти 800 гектар замин басанда аст, дар байни хоҷагиҳои вилояти Хатлон тақсим карда мешавад. Ояндаи наздик миқдори боқимондаи тухмӣ низ ба ҷумҳурӣ ворид гардида, миёни минтақаҳои кишвар тақсим карда хоҳад шуд.
