Мақомоти амнияти Тоҷикистон ду аъзои гурӯҳи нашъаҷаллобро дар ноҳияи Шамсиддин Шоҳин боздошт карда, аз онҳо 58 кг маводи мухаддири навъи ҳашиш, афюн ва героин мусодира кардаанд. Маводи мухаддирро қочоқбарони афғонистонӣ тавассути сарҳади давлатӣ ба Тоҷикистон ворид кардаанд.
Кумитаи давлатии амнияти миллии Тоҷикистон (КДАМ) дар гузорише, ки имрӯз, 18-уми феврал, Телевизиони Тоҷикистон нашр кардааст, гуфтааст, “гумонбарон мехостаанд, маводи мухадирро ба шаҳри Душанбе ва сипас тавассути шарикони худ ба кишварҳои хориҷа интиқол диҳанд”.
Мақомот гуфтаанд, Ғуломалӣ Собирови 57-сола ва Сайфулло Сайфуллоеви 55-сола, сокинони деҳаи Кишти ноҳияи Шамсиддин Шоҳин маводи нашъадорро аз махфигоҳ дастрас карда, дар пинҳонгоҳи мошинашон ҷобаҷо кардаанд.
Ба иттилои манбаъ, аз боздошшудаҳо 30 кг маводи мухаддири навъи афюн, 19 кг ҳашиш ва 9 кг героин дар умум 58 кг маводи нашъаддор дарёфту мусодира кардаанд.
“Қочоқбарони афғон хатти сарҳади давлатиро дар самти деҳаи Кишт ғайриқонунӣ убур карда ва маводи мухаддирро интиқол дода, онро дар махфигоҳ пинҳон намуданд”,-гуфтааст ин ниҳод.
Дар гузориши мақомот, ҳарду гумонбар иттиҳомоти алайҳашон эълоншударо қабул карда, раванди қоҷоқу муомилоти маводи нашъадорро гуфтаанд. Таҳти чӣ шароит сабт шудани ин иқрор маълум нест.
“Аз махфигоҳи махсус, ки шаҳрвандони Афғонистон маводи мухаддирро оварда мемонданд, аз онҷо гирифта ба хонаҳои худ оварда дар махфигоҳи мошинҳоямон ҷойгир кардем. Як соат нагузашта кормандони мақомоти амният омада моро дастгир карданд”,-гуфтааст Сайфулло Сайфуллоев, яке аз боздошшудаҳо.
Мақомот мегӯянд, нисбати боздошшудаҳо бо иттиҳоми “муомилоти ғайриқонунии воситаҳои нашъадор ё моддаҳои психотропӣ…”, “қочоқ” ва “ғайриқонунӣ гузаштан аз сарҳади давлатии Тоҷикистон” (моддаи 200, қисми 4, банди “д”, моддаи 289, қисми 3 ва моддаи 335, қисми 1-и КҶ) парвандаи ҷиноӣ ифтитоҳ шудааст.
Бар асоси ин бандҳои қонунгузорӣ дар алоҳидагӣ ба гумонбарон то 20 соли зиндон ҷазо таҳдид мекунад. Назари боздоштшудаҳо ва пайвандонашон дар робита ба ин қазия маълум нест.
Бояд гуфт, ки пештар аз ин низ мақомоти амнияти Тоҷикистон аз пешгирии қоҷоқу муомилоти маводи мухаддир дар кишвар изҳорот нашр кардааст.
Аз ҷумла, ҳафтаи гузашта дар пайи як амалиёти Қӯшунҳои сарҳадӣ дар марзи Тоҷикистон бо Афғонистон як қочоқбари афғонистонӣ боздошт шуда, аз ӯ 46 баста маводи мухаддир мусодира шуда буд. Гуфта мешуд, ки се ҳамроҳи ӯ ба самти Афғонистон фирор кардаанд.
Тибқи маълумоти Зафар Самад, раиси Оҷонсии зиддинашъаи Тоҷикистон, соли гузашта мақомоти тоҷик дар сарҳади Тоҷикистону Афғонистон 2 тоннаву 742 килограм (соли 2024 – 1 тоннаву 824 кг) маводи мухаддир мусодира кардаанд. Манбаъ афзуд, ки аз ин, 2 тоннаву 566 килограм дар хатти марзи Афғонистон бо вилояти Хатлон ва 186 кг дар марз бо ВМКБ мусодира шудааст.
Дар умум, ба иттилои ин ниҳод дар сарҳади Тоҷикистон ва Афғонистон миёни мақомоти тоҷик ва қочоқбарони афғонистонӣ 17 задухӯрди мусаллаҳона рух дода, дар натиҷа 10 шаҳрванди Афғонистон ва 2 марзбони тоҷик кушта шудаанд. Инчунин 9 шаҳрванди Афғонистон аз суи мақомоти тоҷик барои воридоти маводи мухаддир ба Тоҷикистон дастгир шудаанд.
