Дар ҷашни Наврӯз хонандагони мактабҳо 10 рӯз ва донишҷӯён 6 рӯз пайиҳам истироҳат мекунанд. Дар ин бора аз Вазорати маориф ва илми кишвар ба “Азия-Плюс” хабар доданд.
Ба иттилои вазорат, хонандагони мактаб аз 20 то 29-уми март ва донишҷӯёни макотиби олии кишвар аз 20 то 25-уми март истироҳат доранд. Ҳамчунин, аз 20 то 29-уми март кӯдакистонҳои кишвар низ фаъолият намекунанд.
Вазорат мегӯяд, таътили баҳории хонандагони мактабҳои миёна низ дар ин феҳрист ворид аст. Яъне хонандагон то 25-уми март дар доираи таҷлили Наврӯз ва аз 25 то 29-уми март, 5 рӯз таътили баҳорӣ доранд.
Мувофиқи қарори ҳукумати кишвар, ки моҳи декабр қабул гардида буд, сокинони кишвар (онҳое, ки 5 рӯзи корӣ дар ҳафта доранд) дар ҷашни Наврӯз 9 рӯз пайиҳам, аз 21 то 29-уми март истироҳат мекунанд. Ҳамчунин, имсол иди Рамазон рӯзи 20-уми март таҷлил мешавад ва тибқи қонун, ин рӯз низ истироҳатӣ аст.
Бо назардошти ин, истироҳат барои сокинону донишҷӯён ва таътил барои хонандагон рӯзи 20-уми март оғоз мешавад.
Тибқи қарори ҳукумат, рӯзи ҷумъаи кории 27-уми март ба рӯзи истироҳатии шанбеи 14-уми март гузаронида шуд. Ба иттилои Вазорати маориф, бо ин тартиб, пагоҳ 14-уми март дар кӯдакистонҳо низ рӯзи корӣ аст.
Ҳамин тариқ, рӯзҳои истироҳатӣ барои хонандагон ба ин тартиб аст:
– 20-уми март иди Рамазон;
– аз 21 то 24-уми март рӯзҳои истироҳатии расмӣ барои ҷашни Наврӯз;
– бо назардошти он ки рӯзҳои 21 ва 22-юми март ба рӯзҳои шанбе ва якшанбе рост мегирад, рӯзҳои 25 ва 26-уми март низ истироҳатӣ аст;
– аз 25 то 29-уми март таътили баҳории хонандагон.
Бо ин тартиб, таҳсили донишҷӯён аз 26-уми март ва хонандагони мактаб аз 30-юми март оғоз мешавад.
Бояд гуфт, моҳи март сокинони Тоҷикистон бо назардошти Рӯзи модар, ҷашни Наврӯз, иди Рамазон ва рӯзҳои ғайрикорӣ, 15 рӯз истироҳат доранд: 1, 7, 8, 9, 15, 20, 21, 22, 23, 24, 25, 26, 27, 28, 29.
Ёдрас мешавем, ки соли гузашта низ сокинони Тоҷикистон дар моҳи март 15 рӯз истироҳат доштанд.
