Душанбе. 19-уми феврал. ОИ «Азия-Плюс» – Роҳбари Гурӯҳи Хазинаи байнулмилалии асъор оид ба Тоҷикистон Аксел Шиммелпфенниг
бо натиҷагирӣ аз фаъолияти ҳайати ин гурӯҳ дар Тоҷикистон зимни нишасти матбуотӣ изҳор дошт, ки соли равон то ба 30 дарсад коҳиш ёфтани интиқоли маблағҳои муҳоҷирони тоҷик аз эҳтимол дур нест.
Ба гуфтаи ӯ, чунин вазъ бар асари суст гаштани суръати афзоиши иқтисоди ҷаҳонӣ, бахусус рӯ ба таназзул овардани иқтисоди Русия ба вуқӯъ хоҳад пайваст. Роҳбари намояндагии ХБА дар Тоҷикистон Люк Моерс мегӯяд, дар муқоиса бо моҳи январи соли гузашта ҳаҷми интиқоли маблағҳои муҳоҷирон ба Тоҷикистон 20 дарсад коҳиш ёфтааст.
Мувофиқи маълумоти ХБА, соли 2008 муҳоҷирони тоҷик ба ватан 2,2 млрд $ маблағ интиқол додаанд, ки ин нишондиҳанда ба 45 дарсади Маҷмӯи маҳсулоти дохилии Тоҷикистон баробар аст. Аксел Шиммелпфенниг бо такя ба натиҷаҳои фаъолияти гурӯҳ мӯътақид аст, ки соли ҷорӣ афзоиши воқеии Маҷмӯи маҳсулоти дохилӣ то 3 дарсад коҳиш ёфта, таваррум дар мизони 12-13 дарсад мӯътадил хоҳад шуд.
