Ду рӯзи охир дар пайи шамоли сахт ва боришоти борон дар Душанбе ва чанд шаҳру ноҳияҳои Тоҷикистон даҳҳо дарахт шикаста, чандин хона осеб дида, ҳаракати роҳу низоми барқрасонӣ мушкил шудааст. Инчунин, 5 мошин зери лой монда, 2 сар чорвои калон талаф ёфтаанд.
Тибқи гузориши Кумитаи ҳолатҳои фавқулода ва мудофиаи шаҳрвандӣ дар пайи вазиши шамолҳои сахт дар ду рӯзи гузашта, дар шаҳри Душанбе даҳҳо дарахт шикаста, болопӯши бархе аз баландошёнаҳо қисман зарар дидаанд.
– дар ноҳияи Исмоили Сомонӣ 5 дарахт, болопӯши 5 бино ва рӯйпӯши сохтмони Хадамоти алоқа зиён дидааст;
– дар ноҳияи Сино 8 дарахт, болопӯши 3 бино ва 3 мошин осеб дидаанд;
– дар ноҳияи Фирдавсӣ 3 дарахт, болопӯши 4 бино ва сохтмони Маркази таълимӣ ва қисми ҳарбии КДАМ зарар дидаанд;
– дар ноҳияи Шоҳмансур 6 дарахт шикастааст.
КҲФ гуфтааст, ки дар шамолҳои ду рӯзи гузашта талафоти ҷонӣ сабт нашудааст.
Суғд
Дар натиҷаи омадани сел дар чанд шаҳру ноҳияҳои вилояти Суғд хонаву заминҳои сокинон ва роҳу дигар иншооти ёрирасон зарар дидааст.
Аз ҷумла дар деҳаи Аппонии ноҳияи Ашт ба 36 таҳхонаи иншооти ёрирасони сокинон обу лой ворид шудааст.
Дар чанде аз деҳаҳои шаҳри Панҷакент сел омада, дар натиҷа 26 хона пурра, 1 хона қисман, 34 иншооти ёрирасон, 2 км роҳ, 13,2 км шабакаҳои обёрӣ, хатҳои интиқоли барқ, хатти оби нӯшокӣ ва 70 гектар замини кишоварзӣ зиён дидааст.
Ҳамчунин, дар деҳаи Пиёни ҷамоати Фондарёи ноҳияи Айнӣ санги калон чаппа шуда, ба як иншооти ёрирасон зарар расонидааст.
Навоҳии тобеи марказ
Дар шаҳри Ҳисор ва ноҳияи Рудакӣ дар пайи шамоли сахт чанд дарахт шикаста, хонаҳои зист, иншооти ёрирасон, хатҳои интиқоли барқ ва сутунҳо хароб шудаанд.
Шамоли сахт боми 4 бинои баландошёнаро дар шаҳри Ваҳдат канда, роҳи мошингарди Ваҳдат–Кӯлобро муваққатан бастааст. КҲФ гуфтааст, ки офати табиӣ бартараф ва ҳаракат дар ин роҳ барқарор шудааст.
Дар деҳаи Даҳанаи ҷамоати Ромити ин шаҳр сел як мошинро ба дарёи Кофарниҳон бурдааст. Инчунин, 5 мошин дар лойқа дармонда, 2 симчӯби барқ осеб дида, 2 сар чорвои калон талаф ёфтаанд.
Як муддат роҳи мошингарди Ваҳдат–Ромит низ баста шуда, баъди бартарафкунии офати табиӣ ҳаракати нақлиёт барқарор шудааст.
Дар ноҳияи Сангвор низ дар пайи боришоти шадиди борон роҳи мошингард муваққатан баста шуда, дигарбора боз шудааст.
Тибқи иттилои КҲФ, дар беш аз чор моҳи соли равон (аз 1-уми январ то 13-уми май) дар пайи офатҳои табиӣ 8 тан ҷони худро аз даст додаанд.
Аз ҷумла, шаби 1-уми май дар шаҳри Кӯлоб сел омад, ки дар пайи он се нафар ҷон бохта, се тани дигар ҷароҳат бардоштанд. Чанд хона ва иншооти гуногун зарар дидаанд. Ҳоло хисороти обхезӣ дар шаҳри Кӯлоб маълум нест.
Мақомот қаблан гуфтанд, дар пайи сел дар ин шаҳр 850 оила зарар дидааст.
Тафсилоти ин ҳодиса ва ҳаёти сокинони шаҳрро баъди обхезӣ дар гузориши “Ҳамаи дороиам зери обу лой монд”. Сокинони аз сел зарардидаи Кӯлоб чӣ ҳол доранд? мутолиа кунед.
