Душанбе. 20-уми июл. ОИ «Азия-Плюс» – Ҳафтаи гузашта ҳамаи раёсат ва шӯъбаҳои маорифи шаҳру ноҳияҳои Тоҷикистон ба маблағи беш аз 1 млн. 880 ҳазор сомонӣ бо таҷҳизоти гуногун таъмин карда шуданд.
Чӣ тавре ки ба ОИ «Азия-Плюс» сухангӯи Вазорати маорифи ҶТ Ноилшо Нуралиев иттилоъ дод, таҷҳизоти мазкур аз ҳисоби маблағҳои Бонки ҷаҳонӣ баҳри беҳбуди низоми идораи иттилоотӣ дар соҳаи маориф аз ҷониби Фонди каталикӣ тақдим шудааст. «Таҷҳизот аз 2 сервери мутамарказ бо фарогирии ҳамаи минтақаҳо, 112 компютер, 66 принтер, 85 сканер, 215 дастгоҳи танзимкунандаи барқ, 42 генератор, 63 факс, 17 техникаи нусхабардор, 410 харитаи хотира ва барномаҳои гуногуни компютерӣ иборат аст», – гуфт ӯ.
Ба гуфтаи Нуралиев, ҳадафи аслии бунёди низоми мазкур – таъмини раёсату идораҳои маорифи шаҳру ноҳияҳои ҷумҳурӣ бо технологияи тоза ва саривақт огаҳӣ ёфтан аз фаъолияти шӯъбаҳои маорифи саросари ҷумҳурӣ аст.
