Имсол маҳдудияти мавсимӣ барои ҳаракати нақлиёти гаронвазн дар роҳҳои кишвар аз 1-уми июн ҷорӣ мегардад. Тибқи он, ҳангоми беш аз 25 дараҷа гарм будани ҳаво ҳаракати нақлиёте, ки аз 6 тонна зиёд вазн дорад, аз соати 10-и субҳ то 19-и шом маҳдуд мешавад.
Дар ин бора аз Раёсати нақлиёти рӯйизаминии Вазорати нақлиёти Тоҷикистон ба “Азия-Плюс” иттилоъ доданд.
Аз ин ниҳод гуфтанд, ки маҳдудият бо мақсади пешгирии вайроншавии роҳҳо роҳандозӣ шуда, то 31-уми августи соли ҷорӣ идома меёбад.
Соли гузашта татбиқи маҳдудият дар роҳҳои кишвар барои ҳаракати нақлиёти гаронванз аз 1-уми май оғоз гардида буд. Манбаъ гуфт, сабаби ин тағйирот нисбатан салқин омадани ҳаво дар моҳи май аст.
Ин маҳдудиятҳо дар кадом роҳҳо гузошта мешавад, дар баргаҳои мо бубинед:
Маҳдудият дар дигар роҳҳое мошингард, ки дар ин феҳрист ишора нашудааст, аз 8 тонна боло мебошад.
Қаблан Вазорати нақлиёт гуфта буд, ки маҳдудият нисбат ба мошинҳое, ки мусофирон, кӯмаки башардӯстона, маҳсулоти хӯроквории зудвайроншаванда, борҳои хатарнок, калонҳаҷм, ангишт мекашонанд ва ё иҷозатномаи махсус доранд, татбиқ намешавад.
Қаблан Азим Иброҳим, вазири нақлиёти Тоҷикистон низ аз сифати роҳсозӣ дар кишвар нигаронӣ карда, гуфт, қисматҳои алоҳидаи роҳҳои сохташуда “хеле зуд аз кор мебароянд”.
Ӯ таъкид карда буд, ки мустаҳкамии пӯшиши роҳ аз сифати кор, технологияҳои татбиқшаванда, иҷрои дурусти амалиёти техникӣ, истифодаи дурусти маблағҳои ҷудошуда вобаста аст.
Коршиносон сабаби аслии чунин ҳолатро ба нокифоятии маблағҳои ҷудошуда аз буҷетҳои шаҳру навоҳии вилоят ва пастсифат будани масолеҳ рабт медиҳанд.
