Душанбе. 3-юми июл. ОИ «Азия-Плюс» – Дар давраи таътили тобистонаи парлумонӣ намояндагони мардумӣ аз Ҳизби коммунисти Тоҷикистон бо интихобкунандагони худ дар водии Зарафшон, Рашт ва ВМКБ вохӯриҳо доир месозанд.
Чӣ тавре ки ба ОИ «Азия-Плюс» раиси ҲКТ, намояндаи мардумӣ дар парлумони ҷумҳурӣ Шодӣ Шабдолов иттилоъ дод, «мардум ба намояндагони мардумӣ дар парлумон суолоти зиёде доранд». «Ин суолот ба масъалаҳои ҳифзи иҷтимоии аҳолӣ, рафъи оқибатҳои бӯҳрони молӣ, мушкилоти мавҷудаи муҳоҷирати меҳнатӣ, татбиқи қонунҳои қабулкарда дар маҳалҳо ва ғайра дахл доранд», – гуфт ӯ.
Ба гуфтаи Ш.Шабдолов, «шахсан ӯ аз фаъолияти палатаи поёнии парлумони кишвар дар соли гузашта қаноатманд нест». «Ман омодаам, бо мардум вазъи иқтисодӣ ва иҷтимоии мавҷудаи кишварро баррасӣ намоям», – афзуд ӯ.
