Душанбе. 30-юми июн. ОИ «Азия-Плюс» – Соли ҷорӣ шумори квотаҳои президентӣ барои қабул ба макотиби олии Тоҷикистон афзуда шуд.
Чӣ тавре ки ба ОИ «Азия-Плюс» муовини сардори раёсати макотиби олии Вазорати маорифи ҶТ Ҳоким Валиев иттилоъ дод, барои соли хониши 2009-2010 шумораи квотаҳои перзидентӣ баҳри таҳсил дар макотиби олии кишвар барои хатмкардагони ноҳияҳои дурдаст 1 ҳазору 150 ҷойро (635 ҷой барои духтарон) ташкил дод, ки нисбат ба соли гузашта 43 ҷой зиёдтар мебошад. «Афзоиши шумори квотаҳо ба қонеъ сохтани талаботи минтақаҳо ба кадрҳои баландихтисос вобаста аст», – гуфт ӯ.
Оқои Валиев гуфт, соли ҷорӣ тибқи квотаҳои президентӣ макотиби олиро 508 нафар донишҷӯён хатм намуда, боз таҳсили 2 ҳазору 556 нафар идома дорад. «То имрӯз 2 ҳазору 196 нафар мувофиқи квотаҳои президентӣ соҳиби маълумоти олӣ шуданд», – афзуд Валиев.
