Хуҷанд. 28-уми май. ОИ «Азия-Плюс» – Соли равон кишоварзони вилояти Суғд ният доранд, ки нисбат ба соли гузашта ҳосили бештари пиёзу картошка ба даст оранд, зеро соли сипаригашта пиёзро лозим омад ҳатто аз Русияву дигар кишварҳо ворид созанд.
Чӣ тавре ки ба ОИ «Азия-Плюс» муовини сардори Раёсати кишоварзии вилоят Рустамҷон Раҳимов иттилоъ дод, феълан дар майдони
3016 гектар
пиёз кишт карда шуда, боз барои кишти он 100 гектари дигар боқӣ мондааст, ки дар муқоиса бо соли гузашта
428 гектар
зиёдтар мебошад. Картошка низ дар майдони
2385 гектар
кишт шуда, боз то моҳи июл дар масоҳати 2116 гектари дигар шинонида мешавад.
Тибқи пешгӯиҳои мутахассисон, соли равон ба даст овардани ҳосили пиёз дар ҳаҷми 61 ҳазор тонна ва картошка 112 ҳазор тонна пешбинӣ шудааст, ки нисбат ба соли гузашта мутаносибан 3 ҳазор ва 11 ҳазор тонна бештар мебошад.
