Душанбе. 26-уми май. «Азия-Плюс» – | Дар минтақаи шимоли ҷумҳурӣ як модаре ният дошт, ки духтари 10-солаи худро ба ивази 3 ҳазор долллари ИМА бифурӯшад.
Тавре ба ОИ «Азия-Плюс» аз Вазорати корҳои дохилии ҷумҳурӣ иттилоъ доданд, рӯзи 25-уми майи соли ҷорӣ дар шаҳри Хуҷанд як зани 50-солаи қаблан доғи судӣ дошта боздошт шудааст, ки нияти фурӯхтани духтари 10-солаи худ ба ивази 3 ҳазор доллари ИМА-ро доштааст. «Духтари ноболиғ дар ҳеҷ куҷое таҳсил надошта, дар шароити душвори моддӣ ба воя мерасидааст ва маҳз ин омил модарро маҷбур сохтааст, ки ӯро ба шахсони доротару сарватманд бифурӯшад», – гуфтанд дар вазорат.
Бино ба маълумоти вазорати мазкур, танҳо дар соли гузашта 530 ҷиноёти ба гунае марбут ба хариду фурӯши одамон ошкор карда шудааст. Миёни онҳо 7 далел тибқи моддаи 130 (Одамрабоӣ); 6 далел тибқи моддаи 130 замимаи 1 (Хариду фурӯши одамон); 10 ҳодиса аз рӯйи моддаи 131 (Ғайриқонунӣ маҳрум кардан аз озодӣ); 14 далел тибқи моддаи 132 (Ҷалби одамон барои истисмор); 16 ҳодиса мувофиқи моддаи 167 (Хариду фурӯши ноболиғон)-и КҶ ҶТ ва ғайра ҷой доранд.
