Душанбе. 8-уми январ. ОИ «Азия-Плюс» – Имрӯз зимни нишасти матбуотӣ сардори раёсати сиёсати иқтисодӣ ва банақшагирии Вазорати кишоварзии ҷумҳурӣ Сафар Мамадов изҳор дошт, ки соли равон вазорат кишти пунбадонаро дар 202 ҳазор гектар замин ба нақша гирифтааст.
Ба гуфтаи мутахассис, ҳамасола барои кишти ин зироати стратегӣ тақрибан 260 ҳазор гектар майдони кишт ҷудо мегардид. «Соли ҷорӣ аз ҳисоби заминҳои кишти пахта дар беш аз 50 ҳазор гектар зироатҳои ғалладона, аз ҷумла гандум ва дигар зироатҳо кишт карда мешаванд», – гуфт ӯ.
Ёдрас мекунем, ки соли гузашта дар 253 ҳазор гектар кишти пунбадона гузаронида шуда, бо сабабҳои объективӣ танҳо дар 237 гектари он пунбадона нашъунамо ёфт ва аз нақшаи пешбинишудаи 552 ҳазор тонна пахта ҳамагӣ 351 ҳазору 115 тонна ҳосил ба даст оварда шуд.
