Душанбе. 13-уми декабр. ОИ «Азия-Плюс» = Раиси ассосиатсияи миллии сиёсатшиносони Тоҷикистон – Абдуғанӣ Мамадазимов гуфт, ҳалокати муҳоҷирони меҳнатии тоҷик дар иншооти сохтмонӣ ва ё қатли онҳо ба дасти миллатгароёни рус мояи нигаронии амиқи мардуми мо шудааст. «Вале, мутаассифона, мардуми тоҷик фурсати нишон додани манзалату ҳамбастагии худро нисбат ба чунин ҳодисаҳои фоҷиавӣ аз даст додаанд», – изҳор дошт ӯ.
Мамадазимов дар сӯҳбат бо ОИ «Азия-Плюс» гуфт, ҳангоме ки моҳи феврали соли 2004 аз Санкт-Петербург ҷасади духтараки ноболиғ Хуршеда Султонова ба Душанбе интиқол гардид, онро мебоист ҷамъияти зиёди мардуми мо, бо сарварии вазири корҳои дохилӣ ё умури хориҷа ва ё беҳтараш нахуствазири мамлакат пешвоз мегирифт. Ва низ ба фурудгоҳ мебоист сафири Русия дар Тоҷикистон даъват мешуд.
Коршинос мӯътақид аст, ки агар он вақт дар фурудгоҳи Душанбе аз 5-10 ҳазор одам зиёд ҷамъ мешуд ва агар он ҷо муҷассамае ба хотираи қурбониёни бегуноҳи муҷоҷират мегузоштанду воситаҳои ахбори оммаи Тоҷикистон куштори духтараки бегуноҳро ба таври васеъ инъикос мекарданд, имрӯз шояд вазъият дигар мебуд ва тобутҳо низ камтар ба кишвар ворид мешуданд. «Дигар ҳар нафаре пеш аз азобу шиканҷа ё қатли тоҷики бегуноҳ лаҳзае хашму эътирози як миллати бутунро пеши назар меовард», – гуфт сиёсатшинос.
Дар робита ба нотаи эътирозие, ки дирӯз Вазорати корҳои хориҷии Тоҷикистон дар бастагӣ ба куштори ваҳшиёнаи муҳоҷири тоҷик дар Русия ироа кард, Абдуғанӣ Мамадазимов гуфт, ки кор танҳо бо ироаи як нотаи расмӣ ба анҷом нахоҳад расид.
