Душанбе. 2-юми декабр. ОИ «Азия-Плюс» – Имрӯз дар шаҳри Санкт-Петербург вазири адлияи Ҷумҳурии Тоҷикистон Бахтиёр Худоёров дар ҷаласаи навбатии Шӯрои вазирони адлия дар назди Кумитаи ҳамгиройии кишварҳои узви Иттиҳоди ҳамкории иқтисодии АвруОсиё (ЕврАзЭС) иштирок мекунад.
Тавре аз шӯъбаи таблиғоти ҳуқуқи Вазорати адлияи ҷумҳурӣ ба ОИ «Азия-Плюс» хабар доданд, иштирокдорони ҷаласа масоили ҳамгиройии муштарак дар бахши ҳуқуқ, ҳамоҳангсозии қонунгузориҳои давлатҳо, ташаккул ва татбиқи сиёсати ҳуқуқӣ ва ташкили заминаи воҳиди иттилоотиву ҳуқуқии кишварҳои иттиҳодро мавриди баррасӣ қарор медиҳанд.
Бино ба иттилои манбаъ, дар ҷаласа доир ба таҳияи тарзи ягонаи корбурд, такмили табодули таҷриба дар бахши мавриди амал қарор додани қарорҳои додгоҳӣ, фаъолияти адвокатӣ ва низоми адои ҷазои ҷиноятӣ, коҳиши хавфи коррупсионӣ дар қонунгузорӣ ва таҳияи асноди меъёрӣ ҳуқуқӣ табодули назар сурат хоҳад гирифт.
