Як гумонбар ба кушторе, ки пулис дар вилояти Суғд бо нашри аксаш дар кӯчаву хиёбонҳо бо иттиҳоми куштор ҷустуҷӯ мекард, дастгир шудааст.
Ба иттилои Раёсати ВКД дар вилояти Суғд, ҳодиса рӯзи 8-уми апрел дар коргоҳи “Кабири Хуҷанд”, дар маҳаллаи Чашмаи шаҳри Хуҷанд рух додааст.
Ба қавли масъулини мақомоти корҳои дохилӣ гумонбар Алишер Ҷӯраев, сокини 30-солаи шаҳраки Палоси шаҳри Бӯстон ҳамкораш Иқбол Носирови 40-сола, сокини ҷамоати деҳоти Ғозиёни ноҳияи Бобоҷон Ғафуровро бо зарби корд ба ҳалокат расонидааст.
Гуфта мешавад, миёни гумонбар ва Иқбол Носиров, ки роҳбари сех будааст, барои ба ҷойи кори хуб ва беҳтар таъмин намудан муноқиша мешавад ва он он куштор поён меёбад.
Тибқи иттилои мақомот, гумонбар баъди содир кардани ҷиноят аз ҷойи ҳодиса фирор кардааст. Дар пайи ин, пулис барои зудтар пайдо кардани ӯ, акси гумонбарро дар кӯчаву хиёбонҳои шаҳр насб карда, аз сокинон кумак хоста буд.
Дирӯз, 17-уми апрел аз Раёсати ВКД дар Суғд тасдиқ карданд, ки гумонбар боздошт шудааст. Аммо бо баҳонаи халал нарасонидан ба тафтишот, нагуфтанд, ки ӯ кай ва дар чӣ шароит боздошт шудааст.
Нисбати гумонбар Алишер Ҷӯраев тибқи қисми 1 моддаи 104 Кодекси ҷиноӣ парванда боз шуда, тафтишот идома доштааст. Ҳамчунин, барои фирор ва пинҳон шудан ҳам метавонад муҷозот шавад.
Назари гумонбар ва наздикони ӯ ба қазия маълум нест. Ҳамчунин номаълум аст, ки ӯ бо вакили дифоъ таъмин аст ё не.
