Дар Маркази тадқиқоти стратегии назди президенти Тоҷикистон таҳти раёсати нахуствазири ҷумҳурӣ Оқил Оқилов Маҷлиси умумии солонаи саҳҳомони ҶСК «НБО-и Роғун» ба кор шурӯъ кард.
Тавре ба ОИ «Азия-Плюс» аз котиботи нахуствазири кишвар хабар доданд, дар маҷлис саҳҳомон ҳисоботи солона ва ҳисоботи муҳосибии Ҷамъият барои соли 2011-ро тасдиқ намуда, Шӯрои нозирон ва Комисссияи тафтишотии ҶСК «НБО-и Роғун»-ро дар ҳайати нав интихоб мекунанд. Ҳамчунин саҳҳомон ширкати аудиториро интихоб ва Низомномаи Ҷамъиятро дар таҳрири нав қабул хоҳанд кард.
Ба иттилои манбаъ, дар остонаи баргузории Маҷлиси умумии саҳҳомон дар саросари кишвар барои сабтиноми саҳҳом ҷиҳати иштирок дар маҷлиси мазкур марказҳо ташкил карда шуданд. Ҳар кадоме аз саҳҳом ба иштирок дар маҷлис ҳуқуқ дорад ва барои ин худро танҳо ба қайд гузоштан зарур буд.
Ёдрас мекунем, ки
Маҷлиси аввали умумии саҳҳомони ҶСК «НБО Роғун»
26-уми майи соли 2011 доир гардида буд. Он замон саҳҳомон ҳисоботи солона ва ҳисоботи муҳосибии Ҷамъиятро тасдиқ намуда, Шӯрои нозирон ва Комисссияи тафтишотии ҶСК «НБО-и Роғун»-ро интихоб карданд. Ҳамчунин саҳҳомон ширкати аудиторӣ ва рӯйхати Комиссияи ҳисобро интихоб ва тасдиқ намуда буданд.
Бино ба маълумоти ҶСК «НБО Роғун» дар семоҳаи авали соли равон корҳои сохтмонӣ дар нерӯгоҳи барқиӣ-обии «Роғун»
дар ҳаҷми ҳудуди 245 млн. сомонӣ (зиёда аз 50 млн. $)
маблағгузорӣ шуданд.
Бино ба маълумоти ҶСК «НОБ-и Роғун» аз оғози корҳои барқароркунӣ аз соли 2007 ба сохтмони иншоот аз ҳисоби буҷети давлатӣ зиёда аз 1 млрд. 325 сомонӣ маблағ ҷудо шуд. Соли 2011 ҳаҷми маблағгузорӣ ба сохтмони нерӯгоҳи «Роғун» наздик ба 813 млн. сомониро ташкил дод.
Семоҳаи аввали соли равон дар амалисозии лоиҳаи сохтмони нерӯгоҳи барқӣ-обии «Роғун»
20 ширкати хориҷӣ иштирок карданд.
Ба сохтмони иншооти мазкур 14 ташкилоти паймонкор аз Русия, 4 ширкат аз Украина, ҶСК «ТВЕА»-и Чин ва ҳамчунин ширкати «Geokon Inc» ҷалб гардиданд.
