Кӯлоб. 18-уми июл. ОИ «Азия-Плюс» – Аз майдони умумии 7 ҳазору 390 гектари кишти пахтаи ноҳияҳои Кӯлоб, Фархор, Восеъ ва Ҳамадонии вилояти Хатлон дар 85 фоизи он ниҳолҳои пахта аз 10 то 12 кӯрак доранд, ки ин гувоҳи ҳосилнокии хуб аст.
Ёдрас мекунем, ки хоҷагиҳои ин ноҳияҳо аз ҷониби «Амонатбонк» сармоягузорӣ карда шудаанд.
Агроном ва коршиноси шӯъбаи минтақавии «Амонатбонк» Раҷабалӣ Кулабеков ба ОИ «Азия-Плюс» изҳор дошт, ки хоҷагиҳои деҳқонӣ аз норасоии об гила доранд.
«Дар ноҳияи Восеъ аз 91 хоҷагӣ дар қаламрави ҷамоатҳои Тугарак, Меҳнатобод ва Пахтаобод ба иллати норасоии
об 41 хоҷагӣ ҷиҳати гузаронидани чорабиниҳои агротехникӣ мушкилот доранд», – гуфт ӯ.
Дар канори шаҳри Кӯлоб бо сабаби кори номунтазами пойгоҳи обкашии ба номи С.Назаров ба пойгоҳи обкашии Бештегирмони Боло об кам баромада,
107 гектар
заминҳо беоб мондаанд ва дар хоҷагии деҳқонии «Сабз»-и ноҳияи Кӯлоб аз норасоии об ғизодиҳии дуввуми ниҳолҳоро мавқуф гузоштаанд.
Дар ноҳияи Фархор
300 гектар
ва дар ноҳияи Ҳамадонӣ
100 гектар
замин ба обёрии фаврӣ эҳтиёҷ доранд, то ҳосил талаф дода нашавад.
Ба гуфтаи Р.Кулабеков хушксолии имсола ҳаҷми захираҳои оби обанбори Мӯъминобод ва рӯди Яхсуро коҳиш додааст – дар онҳо об қариб ним баробар кам шудааст, вале корхонаҳои хоҷагии оби минтақа сари вақт чора наадешидаанд.
Чанде қабл, бо иштироки муовини аввали раиси вилояти Хатлон Абдураҳмон Қодирӣ дар шаҳри Кӯлоб машварат баргузор гардид ва дар он низ аз норасоии об изҳори ташвиш карда шуд.
