Душанбе. 21-уми июл. ОИ «Азия-Плюс» – «Барои гузаштан ба хати арабиасос солҳои зиёд лозим аст ва он бояд тибқи барномаи махсус ва омода кардани мардум баргузор гардад», – изҳор дошт дар нишасти матбуотӣ вазири фарҳанги Тоҷикистон Мирзошоҳрух Асрорӣ.Ба назари ӯ, ин масъала танҳо бо имзои қароре ё фармоне амалӣ нахоҳад гашт.
«Ман бо боварии комил гуфта метавонам, ки дар Тоҷикистон ҳудуди 90-95 фоизи аҳолӣ бо хати арабӣ хондаву навишта наметавонанд ва ин омил бояд ҳатман ба назар гирифта шавад», – изҳор дошт вазир ва афзуд, ки омӯзиши хати арабӣ бояд дар нақшаҳои таълимии мактабҳо пешбинӣ карда шавад.
Дар ҳамин ҳол, М.Асрорӣ зикр кард, ки гузариш ба хати арабиасос ба фарҳанг низ таъсир хоҳад гузошт, ки «бар асари он симои фарҳанг низ дигаргун хоҳад гашт».
Мавсуф ҳамчунин баён дошт, ки ба муносибати таҷлили ҷашни 1150-умин солгарди одамушшуаро Абӯабдуллои Рӯдакӣ рӯзҳои наздик дар Туркия ва Русия бо забонҳои тоҷикӣ (бо хати кириллӣ ва арабӣ), русӣ ва англисӣ китобҳои тоза ба табъ мерасанд, ки ба ҳаёту эҷодиёти шоир бахшида шудаанд.
