Душанбе. 15-уми август. ОИ «Азия-Плюс» – Сардори Департаменти иттилооти Вазорати умури хориҷии Тоҷикистон Давлат Назриев изҳор дошт, ки аз ҷараёни кори ҳамоиши Созмони Ҳамкории Шанхай (СҲШ) дар Душанбе беш аз 700 рӯзноманигорони ватаниву хориҷӣ гузориш хоҳанд дод.
«Рӯзи дуввум аст, ки дар вазорат рӯзноманигоронро ҷиҳати иштирок дар ҳамоиш
сабти ном мекунанд», – гуфт ӯ.
Ба гуфтаи Д.Назриев, то имрӯз барои сабти ном рӯзноманигорони шабакаҳои телевизионӣ, рӯзномаву маҷаллаҳо ва расонаҳои хабарии Бритониёи Кабир, Русия, Чин, Ҷопон, Эрон, Шветсия ва кишварҳои дигар муроҷиат кардаанд.
«Барои намояндагони васоити ахбори омма дар бинои нави Бонки Миллии Тоҷикистон маркази матбуот созмон дода мешавад, ки рӯзноманигорон ҷараёни баргузории ҳамоишро аз он ҷо инъикос хоҳанд кард, – иттилоъ дод сарчашма. – Дар Кохи «Сомон» нишасти матбуотии сарони кишварҳои узви СҲШ оид ба натиҷаи гуфтушунидҳо доир мегардад».
