Душанбе. 22-уми сентябр. ОИ «Азия-Плюс» – Дар таърихи 26-уми сентябр ба оғози ҳамкории миёни Тоҷикистону Швейтсария 10 сол пур мешавад.
Аз Дафтари ҳамкории Швейтсария ба ОИ «Азия-Плюс» хабар доданд, ки ба муносибати ин санаи фархунда нишасти матбуотӣ доир гашта, тӯли ду рӯз (26-27-уми сентябр) дар бинои тарабхонаи «Ёқут-2000» як қатор чорабиниҳо баргузор мешаванд. Ба иттилои манбаъ, дар чорабиниҳо аъзои ҳукумат, кормандони корпусҳои дипломатии муқими Душанбе, зиёиён, намояндагони созмонҳои ҷамъиятӣ ва васоити ахбори омма иштирок хоҳанд кард.
Илова бар ин, раиси шаҳри Душанбе дар бораи оғози корҳои омодагӣ ба таҷлили ин ҷашн қарор ба тасвиб расонидааст. Дар қарор бобати рӯзи 27-уми сентябр дар майдони «800-солагии Маскав» баргузор намудани консерт бо иштироки ситораҳои эстрадаи тоҷик Далер Назаров, Шабнами Сурайё ва гурӯҳи «Шамс» иҷозат дода шудааст.
