Душанбе. 23-уми сентябр. ОИ «Азия-Плюс – Кормандони мақомоти ҳифзи ҳуқуқи фурудгоҳи шаҳри Душанбе ба гумони интиқоли маводи мухаддир шаҳрванди Испания Валерий Гаврешукро аз парвози хатсайри «Душанбе-Истанбул» боздоштанд.
Роҳбари дафтари матбуоти Вазорати умури дохилии Тоҷикистон Маҳмадулло Асадуллоев ба ОИ «Азия-Плюс» хабар дод, ки ҳангоми аз назар гузаронидани борхалтаи сафарии боздоштшуда аз он ҳудуди се кило ҳероин дарёфт ва мусодира карда шудааст. Аз рӯи ин далел парвандаи ҷиноӣ оғоз гардид.
Қобили зикр аст, ки ин нахустин ҳодисаи аз ҷониби шаҳрвандони хориҷӣ интиқол додани маводи мухаддир аз Тоҷикистон набуда, қаблан шаҳрвандони Уганда, Африқои Ҷанубӣ, Филиппин ва Афғонистон низ ба ҷурми қочоқи маводи мухаддир боздошт ва маҳкум шудаанд.
