Душанбе. 2-юми октябр. ОИ «Азия-Плюс» – Бо қарори додгоҳи гарнизони низомии шаҳри Душанбе дар Тоҷикистон фаъолияти созмони мазҳабии «Шоҳидони Яҳво» пурра манъ карда шудааст. Дар ин бора ба ОИ «Азия-Плюс» сардори маркази робита бо ҷомеаи Кумитаи давлатии амнияти миллии ҷумҳурӣ Нозирҷон Бӯриев хабар дод.
Бино ба иттилои манбаъ, аввалҳои моҳи сентябр намояндагони созмони мазкур ба додгоҳи номбурда шикоят бурдаанд, ки кормандони мақомоти амният, Хадамоти гумруки назди ҳукумат ва Вазорати фарҳанги ҷумҳурӣ ғайриқонунӣ беш аз 500 ҳазор нусхаи адабиёти моҳияти тарғиботӣ доштаи онҳоро мусодира кардаанд.
«Бо назардошти он, ки созмон чандин маротиба барои вайрон кардани қонунгузории Тоҷикистон огоҳинома гирифтаву гузашта аз ин, фаъолияти он муддати се моҳ мутаваққиф гардида буд, додгоҳ дар бораи манъи фаъолияти пурраи он қарор ба тасвиб расонид», – изҳор дошт манбаъ.
Ёдрас мекунем, ки созмони мазҳабии «Шоҳидони Яҳво» ба фаъолияти худ дар Тоҷикистон соли 1997 оғоз бахшида буд. Мувофиқи маълумоти Вазорати фарҳанги ҷумҳурӣ, феълан дар ҷумҳурӣ 85 созмони мазҳабӣ фаъолият доранд.
