Кӯлоб. 2-юми октябр. ОИ «Азия-Плюс» – Рӯзи 30-юми сентябр дар Кӯлоб ҳайати мушовараи низомии Додгоҳи Олии Тоҷикистон собиқ сардори посгоҳи сарҳадии 8-уми нерӯҳои марзбонии мутааллиқи Кумитаи давлатии амнияти миллии ҷумҳурӣ, роҳбари хоҷагии деҳқонии «Ҳоҷӣ Партов»-и ноҳияи Восеъ Баҳром Ҳабибовро тибқи 19 моддаи Кодекси ҷинои ҶТ гунаҳкор дониста, ба муддати 27 соли зиндон ва адои ҷазо дар маҳбаси низоми шадид маҳкум кард. Дар ин бора ба ОИ «Азия-Плюс» муовини додситони вилояти Хатлон дар минтақаи Кӯлоб, мушовири адлияи дараҷаи аввал Алфаттоҳ Розиқов хабар дод.
Номбурда изҳор дошт, ки Б.Ҳабибов дар содир намудани ҷиноятҳои марбут ба муомилоти ғайриқонунии маводи мухаддир, худсарона азхуд намудани замин ва сохтмони ғайриқонунии иншоот дар он ҳангоми ифои вазифа кардан дар вазифаи раиси хоҷагии деҳқонӣ гунаҳкор дониста шудааст.
«Додситон барои Б.Ҳабибов 30 соли маҳрумият аз озодиро талаб кард, вале аз чунин қарори додгоҳ, ки 27 соли ҷазоро ба ӯ лоиқ донист, низ қаноатманд аст», – афзуд А.Розиқов.
