Душанбе. 14-уми ноябр. ОИ «Азия-Плюс» –
Анҷоми корҳои сохтмон дар нақби
«
Истиқлол
» 20-уми ноябр пешбинӣ шудааст. Дар ин бора ба ОИ «Азия-Плюс» аз хадамоти матбуоти Вазорати нақлиёт ва коммуникатсияи ҷумҳурӣ хабар доданд.
Ба иттилои манбаъ, бетонпӯш кардани 454 метри нақб боқӣ мондааст. «Ҳамарӯза коргарон 66 метри мукааби роҳи нақбро бетонпӯш мекунанд», – гуфт сарчашма.
Зикр гардид, ки феълан дар иншооти мазкур 220 нафар машғули коранд, ки 197 нафари онҳо шаҳрвандони Тоҷикистон мебошанд. Тибқи супориши вазири нақлиёт ва комммуникатсияи ҷумҳурӣ Абдураҳими Ашӯр чанде қабл баҳри суръат бахшидан ба корҳои сохтмони нақб гурӯҳи корӣ бо шумули 42 нафар ташкил гардида, ба иншоот сафарбар гардида буд.
Ёдрас мекунем, ки бо супориши президенти Тоҷикистон баҳри халал нарасонидан ба корҳои сохтмончиён аз 12-уми сентябри соли ҷорӣ ҳаракати нақлиёт дар нақби «Истиқлол» манъ карда шуда буд ва сохтмончиён ба сарвари давлат ваъда дода буданд, ки дар муддати 35 рӯз ҳамаи корҳои пешбинишударо ба анҷом мерасонанд.
