Душанбе. 19-уми ноябр. ОИ «Азия-Плюс» – Хабаргузории
Regnum
бо истинод ба Вазорати умури хориҷии Британияи Кабир иттилоъ медиҳад, ки ин кишвар дар Тоҷикистон сафири нави давлаташро таъин намудааст.
Тревор Чарлз Мур сафири нави Британияи Кабир дар Ҷумҳурии Тоҷикистон таъин шудааст. Сафири тозатаъин аз моҳи январи соли 2009 ба иҷрои ваколатҳои худ шурӯъ мекунад. Сафири кунунии Британия дар Тоҷикистон Грэм Лотен моҳи июли соли 2004 ба ин вазифа таъин гардида буд.
Дар сафорати Британияи Кабир ин хабарро тасдиқ карданд ва афзуданд, ки феълан ин масъала бо ҷониби Тоҷикистон низ мувофиқа карда шудааст.
Тревор Чарлз Мур аз соли 1980 ба ҳайси дипломат фаъолият мекунад. Дар давоми фаъолият ӯ ба ҳайси корманди сафорати Британия дар Белград, Ню-Йорк, Вашингтон, кишварҳои Африқо, Барномаи кӯмаки техникии Британия ба Русия, котиби аввали сафорат дар Вена, муовини роҳбари департаменти Вазорати умури хориҷӣ дар Амрикои Лотин ва дигар мансабҳои дипломатии кишвараш ифои вазифа кардааст. Оиладор буда, соҳиби се писар аст.
