Душанбе. 22-уми ноябр. ОИ «Азия-Плюс» – Соли ҷорӣ гардиши мол миёни Тоҷикистону Русия метавонад ба 1 миллиард доллар баробар шавад. Ин матлабро дирӯз дар Душанбе раиси палатаи савдо ва саноати Тоҷикистон – Шариф Саид зимни вохӯрӣ бо намояндаи тиҷории Русия дар Тоҷикистон – Александр Яковлев баён кардааст.
Тавре ба ОИ «Азия-Плюс» аз палатаи мазкур хабар доданд, дар ҷараёни мулоқот масоили густариши ҳамкориҳои Тоҷикистону Русия дар бахшҳои иқтисоду савдо баррасӣ шуданд.
Зикр гардид, ки баъди вохӯрии сарони кишварҳои Тоҷикистону Русия – Эмомалӣ Раҳмон ва Владимир Путин дар шаҳри Сочи дар соли 2004 табодули молу маҳсулот миёни кишварҳо рӯ ба афзоиш ниҳод.
Манбаъ ҳамчунин хабар дод, ки ояндаи наздик миёни Палатаи савдо ва саноати Точикистон ва Намояндагии тиҷории Русия Ёддошти ҳамкории мутақобила ба имзо хоҳад расид.
