Душанбе. 25-уми ноябр. ОИ «Азия-Плюс» – Имрӯз бо иштироки президенти мамлакат Эмомалӣ Раҳмон бинои аз нав барқароршудаи Донишгоҳи давалатии тиббии Тоҷикистон ифтитоҳ мегардад. Бинои донишгоҳ ахири соли гузашта бар асари сӯхтор хароб гардида буд.
Тавре сардори шӯъбаи таҳлил, назорат ва робита бо ҷомеаи донишгоҳ Исломиддин Саидов ба ОИ «Азия-Плюс» хабар дод, пас аз маросими ифтитоҳ сарвари давлат бо омӯзгорон ва донишҷӯёни донишгоҳ мулоқот хоҳад кард.
Ҷиҳати таҷдиду барқарорсозии бино ҳукумати ҷумҳурӣ 14 млн. сомонӣ маблағ ҷудо намуд. Дар кори таҷдиду барқарорсозии бино ширкатҳои сохтмонии «Авторем», «Асос», «Сомон сохтмон», вазорати тандурустӣ ва донишҷӯёни ин донишгоҳ саҳми назаррас гузоштанд. Барои таъмини бинои донишгоҳ бо техникаву таҷҳизот ҳукуматҳои Ҳиндустону Туркия ва Чин ҳар кадоме чун кӯмак 100 ҳазор долларӣ маблағ ҷудо карданд.
Ёдовар мешавем, ки рӯзи 26-уми декабри соли гузашта бар асари сар задани сӯхтор беш аз 9 ҳазор метри мураббаъи бинои асосии донишгоҳ хароб гардида буд. Осори олимон ва дигар китобҳои китобхонаи донишгоҳ аз сӯхтор эмин монданд. Бинои мазкур соли 1939 сохта шуда, яке аз биноҳои қадими шаҳр маҳсуб мегардид.
