Душанбе. 3-юми декабр. ОИ «Азия-Плюс» – Дирӯз дар маҷмааи давлатии «Кохи Ваҳдат»-и шаҳри Душанбе дар мавзӯи «Имконоти таъсиси телевизиони ҷамъиятӣ дар Тоҷикистон» мизи мудаввар доир гашт.
Доктори уулуми филологӣ, омӯзгори бахши журналистикаи байнулмилалии Донишгоҳи миллии Тоҷикистон Ҷовид Муқим дар мусоҳиба бо хабарнигори ОИ «Азия-Плюс» изҳор дошт, ки шабакаҳои давлатии телевизион дар хизмати мансабдорон буда, фъолияти журналистони касбӣ камтар мушоҳида мешавад ва аз ин рӯ, бинандагон аз тамошои барномаҳои холисона ва пурмӯҳтаво бебаҳра мемонанд. «Аксаран доир ба ин ё он мавзӯъ фикру ақидаи холисонаи аҳолии ҷумҳурӣ намоиш дода намешавад», – гуфт ӯ.
Ҷ.Муқим мегӯяд, ки дар шабакаҳои ғайридавлатӣ низ вазъ чунин аст, зеро феълан онҳо аз манфиатҳои гурӯҳи муайяне пуштибонӣ намуда, бо назардошти манфиатҳои тиҷоратии худ барнома таҳия месозанд ва ин манфиатҳо ҷавобгӯи манфиатҳои аҳолӣ нестанд. «Мутмаинам, ки таъсиси телевизиони ҷамъиятӣ яке аз масъалаҳои умдаи рӯз дар Тоҷикистон аст», – гуфт коршинос.
Қобили зикр аст, ки нахустин телевизиони ҷамъиятӣ нимаи солҳои 20-уми асри гузашта дар Британияи Кабир ба вуҷуд омада, феълан 40 тарзи фаъолияти он роҳандозӣ шудааст.
