Душанбе. 11-уми декабр. ОИ «Азия-Плюс» – Имрӯз дар мусоҳиба бо хабарнигори ОИ «Азия-Плюс» раиси Саридораи геологияи ҷумҳурӣ Азим Иброҳим иттилои қаблан додаи тобеъони худро дар мавриди таҷлил нагардидани Рӯзи байнулмилалии кӯҳ дар Тоҷикистон рад намуда, изҳор дошт, ки дар Тоҷикистон низ дар қатори дигар кишварҳои ҷаҳони имрӯз Рӯзи байнулмилалии кӯҳ (International Mountain Day) ҷашн гирифта шуд. Ин сана соли 2003 бо қарори иҷлосияи 57-уми Асссамблеяи генералии СММ таъин гардида буд.
Ба қавли ӯ, 93 дарсади қаламрави Тоҷикистонро кӯҳҳо ташкил медиҳанд ва маҳз онҳо озмоишгоҳи кушоди омӯзиши ҷинсҳои кӯҳӣ, макони будубоши ҳайвоноту набототи нодир ва сарчашмаи оби рӯдхонаҳои бузурги кишвар шуморида мешаванд. «Айни замон мо бо ташкилоти байнулмилалӣ ҷиҳати омӯзишу таҳқиқоти пиряхҳои мавҷуда дар кӯҳҳои ҷумҳурӣ гуфтушунид дорем», – зикр кард ӯ.
Дар қатъномаи Ассамблеяи генералии СММ муҳимияти махсуси масъалаи таъмини рушди устувори минтақаҳои кӯҳӣ таъкид шудааст. Ассамблеяи генералӣ аз ҷомеаи ҷаҳонӣ даъват ба амал овардааст, ки дар ин рӯз бо мақсади таблиғу ташвиқи аҳамияти рушди устувори минтақаҳои кӯҳии ҷаҳон дар ҳама сатҳҳо чорабиниҳо ташкил намоянд.
