Кӯлоб. 15-уми декабр. ОИ «Азия-Плюс» – Имрӯзҳо дар шаҳри Кӯлоб як халтаи 50-килограммаи ордро ба 100 сомонӣ харидан мумкин аст ва ин дар ҳолест, ки ҳамагӣ ду ҳафта пештар арзиши он 10-15 сомонӣ бештар буд.
Тавре коршиносони маҳаллӣ ба хабарнигори ОИ «Азия-Плюс» изҳор доштанд, коҳиши арзиши орд ба кам шудани арзиши маводи сӯзишворӣ, афзоиши воридоти орд аз Қазоқистон ва беҳтар шудани фаъолияти комбинати истеҳсоли маҳсулоти ордии шаҳр марбут аст.
Сарвари корхонаи мазкур Абдусалом Грезов мегӯяд, ки ҳукумати Қазоқистон бо истеҳсолкунандагони зироати ғалладонаи кишвар бобати харидории 2000 тонна маҳсулот шартнома ба тасвиб расонидааст. «Аз ин миқдор дар корхона орд тайёр карда шуда, он бо арзиши 86 сомонӣ барои як халта орд ба фурӯш бароварда мешавад», – гуфт ӯ.
Дар ҳамин ҳол, коҳиши нархи маводи сӯзишворӣ ба арзиши хизматрасонии нақлиёт ҳеҷ таъсире нагузоштааст. Ҳарчанд нархи бензин поин рафта бошад ҳам, вале арзиши равуо дар нақлиёт мисли пешин боқӣ мондааст ва гузашта аз ин, қимат ҳам шудааст.
