Душанбе. 3-уми январ. ОИ «Азия-Плюс» – Дар соли 2009 нархи гази Ӯзбекистон ба Тоҷикистон 240 $ барои ҳазор метри мукааб муқаррар шуд. Чанде қабл дар ин хусус миёни КВД «Тоҷикгаз» ва ширкати саҳомии «Узтрансгаз» қарордод ба имзо расид.
Тавре директори генералии КВД «Тоҷикгаз» Фатҳиддин Мӯҳсиддинов ба ОИ «Азия-Плюс» хабар дод, тибқи қарордод дар соли 2009 Тоҷикистон аз кишвари ҳамсоя дар ҳаҷми 530 млн. мтри мукааб газ харидорӣ хоҳад кард. «Аввал ҷониби Ӯзбекистон арзиши газро 300 $ муқаррар кард, вале дар натиҷаи гуфтушунидҳо мо тавонистем ба он муваффақ гардем, ки нархи он ба миқдори 60 $ камтар карда шавад», – гуфт ӯ.
Қобили зикр аст, ки соли 2008 ҷумҳурии мо аз Ӯзбекистон газро бо арзиши 145 $ барои 1000 метри мукааб ворид месохт.
