Душанбе. 14-уми январ. ОИ «Азия-Плюс» – Вазорати маорифи ҷумҳурӣ тасмим гирфтааст, то соли 2012 мувофиқи барномаи таълим ва нақшаи омӯзиш барои синфҳои 1-11-и макотиби таҳсилоти умумии ҷумҳурӣ китобҳои дарсии нав нашр созад.
Вазири морифи ҷумҳурӣ Абдуҷаббор Раҳмонов ба рӯзноманигорон гуфт, дар ҷаласаи ҳайати мушовараи вазорат дар ин хусус қарор қабул гардида, барои таҳияи китобҳои дарсӣ мувофиқи ҷаҳонбинӣ ва талаботи толибилми ҷаҳони муосир гурӯҳҳои корӣ таъсис дода мешаванд.
Ёдрас мекунем, ки тибқи маълумоти вазорати маорифи ҷумҳурӣ дар давраи солҳои 2007-2008 барои мактабҳои таҳсилоти умумии кишвар 37 номгӯи китобҳои дарсӣ бо шумораи умумии 3,5 млн нусха нашр гардидааст, ки барои чопи он беш аз 14 млн. сомонӣ маблағ масраф шудааст.
Дар масъалаи сифати таълим вазири маориф зикр кард, ки нисбат ба соли 2007 он каме беҳтар шуда, толибилмон ва донишҷӯён дар гирифтани донишҳои иловагӣ бештар ҳавасманд гаштаанд. «Вале то ҳанӯз аз сифати таълим дар макотиби таҳсилоти умумӣ ва олӣ сарвари давлат ва вазорати маориф қаноатманд нестанд ва он ба меъёрҳои давлатии таълим ҷавобгӯ нест», – таъкид сохт А.Раҳмонов.
