Душанбе. 17-уми январ. ОИ «Азия-Плюс» – Дар ҷаласи ҷамъбастии ҳукумати кишвар рӯзи 15-уми январ президенти Тоҷикистон Эмомалӣ Раҳмон изҳор дошт, ки ҳукумати Тоҷикистон ният дорад, шумораи нерӯгоҳҳои хурди барқиро дар ҷумҳурӣ беш аз 30 дарсад зиёдтар намояд.
Сарвари давлат ба сохторҳои дахлдори вазорати энергетикаву саноати ҷумҳурӣ супориш дод, ки то ахири сол мавриди истифода қарор гирифтани 50 нерӯгоҳи хурди нав дар кишварро таъмин созанд.
Дар ҳамин ҳол, тибқи маълумоти ширкати «Барқи тоҷик» феълан дар Тоҷикистон 155 нерӯгоҳи хурди барқӣ бо иқтидори умумии 12,5 ҳазор кВт/соат ба қайд гирифта шудааст, ки аз онҳо 101-тоаш бо иқтидори 4,6 ҳазор кВт/соат амал мекунад. Зикр гардид, ки соли 2008 дар нерӯгоҳҳои хурди барқӣ 19,5 млн. кВт/соат нерӯи барқ тавлид гаштааст.
