Душанбе. 27-уми феврал. ОИ «Азия-Плюс» – Вазорати кишоварзӣ ният дорад, бо назардошти ҳосилнокии майдони кишт ба ҳукумат оид ба тақсими пурсамару оқилонаи маблағҳои буҷавӣ ба хоҷагиҳои пахтакори кишвар пешниҳодоту тавсияҳои худро ирсол намояд.
Тавре сухангӯи вазорати кишоварзӣ Нарзулло Додобоев ба ОИ «Азия-Плюс» хабар дод, иқдоми мазкур ба хотири пешгирии афзоиши қарзҳои хоҷагиҳои пахтакор, ки соли гузашта ҳосилнокиашон 20-25 сентнерро ташкил медод, сурат мегирад. «Мо ният дорем, ба бонкҳо тавсия бидиҳем, ки зимни ҷудо намудани қарз ба хоҷагиҳо ҳосилнокии майдони киштро ба назар бигиранд, то пешбинӣ карда тавонанд, ки оё ин хоҷагӣ саривақт қарзи онҳоро пардохта метавонад ё не», – гуфт ӯ.
Ба гуфтаи ӯ, пешниҳодоту тавсияҳои мазкур бар асоси таҳлили нишондиҳандаҳои ҳосилнокии хоҷагиҳо дар соли гузашта омода гардидааст. Номбурда таъкид сохт, ки иқдоми мазкур хусусияти тавсиявӣ дошта, вазорат ҳуқуқ надорад ба фаъолияти бонкҳо оид ба ҷудо намудани қарз ба хоҷагиҳо дахолат намояд.
