Душанбе. 14-уми апрел. ОИ «Азия-Плюс» – Ба маблағи 6 млн. сомонӣ ба Тоҷикистон аз Туркия 300 тонна тухмии хушсифати пунбадонаи навъи «Флора» ва «Кармен» ворид гардид.
Чӣ тавре ки аз Вазорати кишоварзии ҷумҳурӣ ба ОИ «Азия-Плюс» хабар доданд, тибқи пешгӯиҳо, имсол ҳосилнокии ин навъи тухми пунбадона бояд аз 35 то 45 сентнер аз як гектарро ташкил диҳад. «Ҳосилнокии 60 тонна аз ин навъи тухмии пунбадона, ки соли гузашта дар водии Ҳисор мавриди истифода қарор гирифта буд, 33 сентнер аз як гектарро ташкил дод», – гуфт манбаъ.
Ба иттилои манбаъ, дар баробари ворид сохтани тухмӣ, инчунин аз Туркия 15 адад техникаи кишоварзии соҳаи пахтакорӣ оварда шудааст. То имрӯз нақшаи кишти чигит дар ҷумҳурӣ ба андозаи 40 дарсад ба иҷро расидааст.
