Душанбе. 15-уми апрел. ОИ «Азия-Плюс» – Шурӯъ аз 27-уми феврал то имрӯз ба Тоҷикистон дар ҳаҷми беш аз 670 млн. кВт/соат нерӯи барқи Ӯзбекистону Туркманистон ворид гардид.
Чӣ тавре ки аз ширкати «Барқи тоҷик» ба ОИ «Азия-Плюс» хабар доданд, дар семоҳаи аввали соли ҷорӣ ба ҷумҳурӣ 165 млн. нерӯи барқи Ӯзбекистон ва 330 млн. кВт/соат нерӯи барқи Туркманистон интиқол дода шуд.
Бино ба иттилои манбаъ, феълан ҳаҷми воридшавии об ба обанбори нерӯгоҳи Норак беш аз 470 метри мукааб дар як сонияро ташкил дода, сатҳи ҷоришавии об аз он ба 520-530 метри мукааб дар як сония баробар аст. «Дар сурати афзудани ҳаҷми ҷоришавии об ба обанбор метавон аз интиқоли нерӯи барқи кишварҳои ҳамсоя даст кашид», – афзуд манбаъ.
