Душанбе. 18-уми апрел. ОИ «Азия-Плюс» – Дар шаҳри Душанбе ба гумони даст доштан дар куштор ва нигаҳдории ғайриқонунии силоҳ бародари Маҳмадназар Солеҳов, собиқ вазири умури дохилии ҶТ – Тағойназар Солеҳов боздошт гардид.
Чӣ тавре ки муовини аввали додситони пойтахт Сайфиддин Сироҷзода ба ОИ «Азия-Плюс» хабар дод, Т.Солеҳов ба қатли хеши худ, корманди милиса Далер Фозилов гумонбар дониста мешавад.
Бино ба иттилои манбаъ, нисбат ба боздоштшуда тибқи моддаҳои 104 (Куштор) ва 195-и Кодекси ҷиноии ҶТ (Харидории ғайриқонунӣ, интиқол, фурӯш ва нигаҳдории ғайриқонунии силоҳ, муҳимот, маводи тарканда ва дастгоҳҳои тарканда) парвандаи ҷиноӣ оғоз гардидааст.
Айни замон Т.Солеҳов дар боздоштгоҳи муваққатии Раёсати умури дохилии шаҳри Душанбе қарор дорад.
