Душанбе. 20-уми май. ОИ «Азия-Плюс» – Таъмири агрегати саввуми нерӯгоҳи «Норак» аввали моҳи июн ба анҷом мерасад.
Чӣ тавре ки ба ОИ «Азия-Плюс» аз ШСХК «Барқи тоҷик» иттилоъ доданд, мутобиқи нақша, мутахассисони ширкати русиягии ҶДММ «Бурейск СГ» насби таҷҳизоти агрегатро бояд то рӯзи 5-уми июн ба итмом расонанд. «Чархаи кории агрегати саввум дар корхонаи механикиву турбинаи Сумск (Украина) тайёр карда шуда, дигар қисмҳои эҳтиётӣ дар дохили кишвар, аз ҷмла, дар корхонаи «Текстилмаш» аз таъмири асосӣ бароварда шуданд», – гуфт манбаъ.
Ба иттилои манбаъ, ҷиҳати дар сатҳи зарурӣ аз таъмир баровардани таҷҳизот мутахассисони украинӣ даъват шудаанд ва онҳо аз рафти раванди истеҳсолоти технологӣ назорат мебаранд. «Айни замон дар корхонаи Сумск барои яке аз агрегатҳои нерӯгоҳ чарха тайёр карда мешавад ва мутобиқи шартнома, он бояд то моҳи сентябр омода гардад», – гутфанд дар ширкат.
Зикр гардид, ки дар марҳилаи аввал қарор шуда буд, ки аз 9 чархаи корӣ дар корхонаи Сумск сетоаш тайёр карда мешавад, вале феълан масъалаи омода сохтани агрегатҳои боқимонда дар корхонаи «Турбоатом»- шаҳри Харкови Украина мавриди баррасӣ қарор дорад ва гуфтушунидҳо дар ин хусус ба марҳилаи ниҳоӣ расида, ояндаи наздик имзои қарордод дар назар аст.
