Душанбе. 26-уми май. ОИ «Азия-Плюс» – Субҳи имрӯз вазири мудофиаи Қазоқистон Даниял Аҳмедов ҷиҳати анҷоми боздиди корӣ вориди Тоҷикистон шуд.
Чӣ тавре ки ба ОИ «Азия-Плюс» котиби матбуотии Вазорати мудофиаи ҶТ Фаридун Маҳмадалиев иттилоъ дод, дар доираи сафари дурӯза вазири мудофиаи кишвари ҳамсоя бо президенти Тоҷикистон Эмомалӣ Раҳмон, нахуствазири ҷумҳурӣ Оқил Оқилов, раиси ММ МО ҶТ Маҳмадсаид Убайдуллоев ва дигар шахсони расмӣ дидору гуфтушунид мекунад.
Ба гуфтаи Ф.Маҳмадалиев, зимни вохӯрии вазирони мудофиаи Қазоқистону Тоҷикистон баррасии масоили ҳамкории дуҷониба дар соҳаи низомиву техникӣ, баргузории тамринҳои низомии муштарак ва дар муассисаҳои таълимии ҳарбии Қазоқистон тайёр кардани кадрҳои низомӣ барои Артиши миллии ҷумҳурӣ ба нақша гирифта шудааст.
