Душанбе. 20-уми июл. ОИ «Азия-Плюс» – Дар нимсолаи аввали соли ҷорӣ аз ҷониби мақомоти сабти асноди ҳолати шаҳрвандии ҷумҳурӣ 15 993 ҳодисаи вафоти шаҳрвандон ба қайд гирифта шуд ва ин дар ҳолест, ки дар ҳамин давраи соли гузашта ин рақам ба 16, 4 ҳазор нафар баробар буд.
Имрӯз зимни як нишасти хабарӣ вазири адлияи ҶТ Бахтиёр Худоёров изҳор дошт, ки дар ин давра 41,4 ҳазор маросими ақди никоҳ сабт шуда, ин шумора дар ҳамин давраи соли гузашта муодили 45,4 ҳазор буд.
Ба гуфтаи Б.Худоёров, дар ин давра мақомоти сабти асноди ҳолати шаҳрвандии ҷумҳурӣ зиёда аз 185 ҳазор аснодро ба қайд гирифта, идораҳои нотариалии давлатӣ беш аз 212,8 ҳазор амалиёти нотариалиро ба расмият дароварданд. «Барои амалиётҳои нотариалии ба расмият даровардашуда аз тарафи нотриусони давлатӣ ба маблағи ҳудуди 7 млн. 363 ҳазор сомонӣ (зиёда аз 1,67 млн. $) боҷи давлатӣ ба буҷаи давлат ситонида шуд», – афзуд вазири адлияи ҶТ.
