Душанбе. 28-уми июл. ОИ «Азия-Плюс» – Дар нимсолаи аввали соли ҷорӣ сохторҳои зертобеъи ШСХК «Барқи тоҷик» 5,906 млрд. кВт/соат нерӯи барқ истеҳсол карданд, ки дар муқоиса бо ҳамин давраи соли гузашта 11,4 дарсад (соли 2008 –
6,582 млрд. кВт/соат) камтар аст.
Раиси ширкати «Барқи тоҷик» Санъат Раҳимов изҳор дошт, ки яке аз сабабҳои коҳиши ҳаҷми истеҳсоли нерӯи барқ дар фасли зимистон кам кардани ҳаҷми истеҳсоли он ба хотири оқилона сарфа намудани захираҳои обӣ мебошад ва иллати дигар дар он аст, ки таъмини ҷумҳурӣ бо нерӯи барқ дар ин давра қисман аз ҷониби нерӯи барқи истеҳсолшуда дар нерӯгоҳи Сангтӯда-1 сурат гирифтааст. «Дар шаш моҳи соли ҷорӣ дар нерӯгоҳи Сангтӯда-1 773 млн. кВт/соат нерӯи барқ истеҳсол шуд, ки нисбат ба ҳамин давраи соли гузашта 488 млн. кВт/соат зиёдтар аст», – гуфт ӯ.
Коҳиши ҳаҷми истеҳсоли барқ дар ин давраро раиси ширкат ҳамчунин ба кам шудани талабот ба истифодаи нерӯи барқ дар бахши саноати ҷумҳурӣ низ марбут медонад. «Талаботи КВД «Талко» ба нерӯи барқ дар ин давра ба миқдори 410 млн. кВт/соат коҳиш ёфта, инчунин бинобар боришоти зиёд баҳори соли равон, пойгоҳҳои обкашӣ низ дертар ба фаъолият шурӯъ карда, 168,5 млн. кВт/соат камтар нерӯи барқ истифода карданд», – афзуд С.Раҳимов.
