Хуҷанд. 21-уми июн. «Азия-Плюс» — | Хушксолии имсола ба пиллапарварони вилояти Суғд имкон надод, ки ҳосили хуб ба даст оранд.
Тавре ба хабарнигори ОИ «Азия-Плюс» аз идораи «Пилла»-и влояти Суғд хабар доданд, то санаи 20-уми июн 559,1 тонна ашёи хоми абрешим ҷамъоварӣ карда шудааст, ки ба 55,9%-и нақшаи пешбинишуда баробар аст. «Обуҳавои беҳад гарм ба он оварда расонид, ки баргҳои дарахти тут дурушт гардида, дар чанде аз ноҳияҳо, аз қабили Мастчоҳ, Зафаробод ва ғайра дарахтони тут бар асари беобӣ тамоман хушк шуданд», – гуфт сарчашма.
Бино ба иттилои манбаъ, соли равон мушкилоти дарёфти тухми кирмаки хушсифат ва сармоягузори боэътимод ҷой надошт. «ҶДММ «Дӯстӣ Афғонистон» ва ҶДММ «ВТ-Силк» ба бахши мазкур дар маҷмӯъ 1,9 млн. сомонӣ маблағгузорӣ карда, аз Чин 19 ҳазор қуттӣ кирмаки хушсифат оварда шуда буд, – гуфтанд дар идораи вилоятӣ. – Сармоягузорон арзиши ашёи хомро низ панҷ маротиба боло бурданд, вале ҳама деҳқонон ба он бовар накарда, соли равон аз пиллапарварӣ даст кашиданд».
Нақшаи имсолаи ҷамъоварии пилла ба 1000 тонна ашёи хоми абрешим баробар аст ва ҳарчанд иҷрои он муяссар нагардад ҳам, ба ҳар ҳол, нисбат ба соли гузашта вазъи корҳо дар ин соҳа беҳтар аст, зеро соли гузашта бо муқаррар сохтани нақшаи 1300 тонна дар ҳамин давра ҳамагӣ 396 тона (30,4%-и нақша) пилла тайёр карда шуда буд.
Зимнан зикр гардид, ки маъракаи парваришу ҷамъоварии пилла дар минтақаи шимоли кишвар ду-се ҳафтаи дигар идома ёфта, пиллапарварон боз 2-3%-и нақша ҳосил ҷамъоварӣ хоҳанд кард. «Даҳ фоизи ҳосил дар вилояти Суғд коркард шуда, боқимонда ба хориҷи кишвар содирот мешавад», – афзуд манбаъ.
