Душанбе. 25-уми июл. «Азия-Плюс» — | Дар робита ба масъалаи изҳороти пешвои ҳизби сиёсии «Справедливая Россия» Александ Агеев перомуни аз ҷониби тамоми муҳоҷирони меҳнатии хориҷӣ ҳатман донистани забон ва таърихи Русия, роҳбари шӯъбаи таблиғот ва кор бо ВАО-и Ҳизби халқии демократии Тоҷикистон Усмон Солеҳов чунин ибрози андеша намуд, ки он ба андозае асоснок ва мантиқан дуруст аст.
Ба қавли Солеҳов, пешниҳоди Агеев пеш аз ҳама ба мутобиқшавии ҳарчи зудтари муҳоҷирони корӣ ба воқеъияти Русия нигаронида шудааст.
«Ғайр аз ин, бе надонистани забон, муҳоҷирон дар ҳифзи ҳуқуқ ва донистани ӯҳдадориҳои худ ба мушкилоти зиёде мувоҷеҳ мегарданд», – гуфт вай.
Солеҳов фаъолияти курсҳои кӯтоҳмуддати омӯзиши забони русиро, ки ахиран дар Тоҷикистон ифтитоҳ ёфтанд, муассир намешуморад. «Ман аз ин шубҳа дорам, ки агар шахс дар муддати даҳ соли омӯзиш дар мактаб забони русиро омӯхта натавониста бошад, пас ба гумон аст, ки дар муддати 1-2 моҳ ба он ноил гардад», – изҳор кард ӯ.
Намояндаи ҲХДТ мӯътақид аст, ки агар пешниҳоди пешвои ҳизби «Справедливая Россия» мавриди дастгири ҳукуматдорони рус қарор гирад, ба ҷараёни омӯзиши забони русӣ аз ҷониби муҳоҷирони кории хоҳиши дар Русия фаъолиятдошта такони ҷиддӣ хоҳад бахшид.
