Душанбе. 2-юми август. «Азия-Плюс» — | Сафири ИМА Кен Гросс 23 корманди Вазорати корҳои дохилӣ, Вазорати адлия ва Кумитаи давлатии амнияти миллиро бо хатми курси таълимии «Озмоиши криминалистии ҷойи амалҳои террористӣ» табрик намуд. Дар нутқи худ Сафир Гросс қайд намуд, ки Иёлоти Муттаҳидаи Амрико муносибатҳои аълои худро бо Ҳукумати Тоҷикистон қадрдонӣ намуда, умедвори ҳамкории давомдор ва дастовардҳои умумӣ аст.
Тавре аз сафорати ИМА дар Тоҷикистон иттилоъ доданд, афсарони мақомоти ҳифзи ҳуқуқ пайдо, бо санад асоснок кардан ва омода намудани далели ҷойи амалро барои таъқиби қонунӣ дар сатҳи криминалистии байналмилалӣ аз худ карданд.
Сафир Гросс изҳор намуд: «Озмоиши криминалистӣ ин пойсутуни тафтишоти ҳар як ҷойи амали террористӣ ва хусусияти муҳими муборизаи ҳукумати Тоҷикистон зидди терроризм мебошад. Афсарони хати пеши милитсия бояд тафтишоти ҷойи амалро барои боздошт ва таъқиби қонунии шахсони айбдорро бо маҳорати касбӣ иҷро кунанд».
Курси озмоиши криминалистии ҷойи амали террористӣ соли 2011 ин сеюмин курси кӯмакдиҳӣ ба мубориза зидди терроризм (АТА) мебошад, ки аз ҷониби идораи амнияти минтақавии Сафорати ИМА маблағгузорӣ шудааст. Аз соли 2002 беш аз 440 кормандони Ҳукумати Тоҷикистон дар фаъолияти омӯзишие ширкат варзиданд, ки аз ҷониби АТА ба ҳисоби беш аз 6 миллион доллар маблағгузорӣ шудааст. Барномаҳои омӯзишӣ дар Иёлоти Муттаҳида ва Тоҷикистон доир мегарданд.
Дафтари Барномаи кӯмакдиҳӣ ба мубориза зидди терроризм соли 1983 дар назди Идораи амнияти дипломатии Департаменти давлатии ИМА таъсис дода шудааст. Он механизми асосии ҳукумати ИМА барои таъминнамоии барномаҳои омӯзишӣ, таҷҳизот ва технология барои давлатҳои ҳамкори ИМА мебошад, ки бар зидди терроризм мубориза мебаранд.
Барномаи мазкур яке аз барномаҳои зиёди кӯмакдиҳандае мебошад, ки Сафорати ИМА аз номи мардуми Амрико дар Тоҷикистон татбиқ менамояд. Аз соли 1993 инҷониб халқи Амрико барои барномаҳои кӯмакдиҳандае, ки рушди иқтисод, ниҳодҳои демократӣ, соҳаҳои тандурустӣ, маориф ва амнияти Тоҷикистонро дастгирӣ мекунанд, беш аз 984 миллион доллар таъмин намудааст.
