То 1-уми сентябри соли равон аз макотиби динии кишварҳои исломӣ 1 ҳазору 950 ҳазор нафар шаҳрвандони Тоҷикистон ба ватан баргардонида шуданд.
Тавре ба ОИ «Азия-Плюс» сардори шӯъбаи маорифи Кумита оид ба корҳои дини назди ҳукумати ҷумҳурӣ Идибек Зиёев хабар дод, умуман дар кишварҳои исломӣ 2 ҳазору 413 нафар тоҷикистониён дар макотиби динӣ таҳсили илм мекарданд.
«Ба ватан танҳо он донишҷӯёне барнагаштанд, ки расман аз ҷониби Кумита оид ба корҳои дин ба таҳсил фиристода шуда буданд», – гуфт вай.
Ба қавли ӯ, аз донишҷӯёни ба ватан баргашта 129 нафар ба муассисаҳои таълимотии маҳаллӣ, 67 нафар ба макотиби таҳсилоти умумӣ, 57 нафар ба макотиби олии гуногун ва 8 нафар ба мадрасаҳо қабул карда шудаанд.
«Аммо донишҷӯёне низ ҳастанд, ки пас аз бозгашт боз ба ҷойи таҳсили пешина рафтанд, зеро онҳо дар курси охир таҳсил мекарданд ва мо ба онҳо иҷозат додем, ки таҳсилашонро ба итмом расонанд», – иброз дошт намояндаи кумита.
Дар мавриди тақдири минбаъдаи дигар донишҷӯёни баргашта Зиёев гуфт, «онҳо дар дохили кишвар ба таҳсили худ идома дода наметавонанд, зеро ягон ҳуҷҷате надоранд, ки таҳсилашон дар марказҳои динии кишварҳои исломиро тасдиқ намояд, вале айни замон аксари онҳо дар созмонҳои динӣ фаъолият дошта, бархеашон муҳоҷирати меҳнатӣ дар хориҷи кишварро ихтиёр кардаанд».
Қобили зикр аст, ки ҷавонони тоҷик асосан дар макотиби динии кишварҳои исломие чун Арабистони Саъудӣ, Либия, Миср, Эрон, Покистон ва Яман таҳсил мекарданд.
