Имрӯз дар маҷмааи давлатии «Кохи Борбад»-и шаҳри Душанбе бо иштироки ситораҳои эстрадаи кишварҳои узви Иттиҳоди Давлатҳои Мустақил бори дуюм ҷашнвораи байнулмилалии «Фазои Иттиҳод» баргузор мешавад.
Тавре ба ОИ «Азия-Плюс» директори генералии Муассисаи давлатии ташкили консертҳо ва сафарҳои ҳунарии «Базморо» Олим Акрамов хабар дод, Тоҷикистонро дар ин ҷашнвора сарояндагон Нозияи Кароматулло, Меҳрнигори Рустам ва Зикриоллоҳ Ҳакимов намояндагӣ мекунанд.
Дар ҷашнвораи мазкур аз Русия – сарояндагон Максим, Юлия Савичева ва Сергей Лазарев, Арманистон – Айк Каспаров, Озарбойҷон – Серан Исмоилхонов, Белорус – Алена Ланская, Қазоқистон – гурӯҳи «Роҳат Луқум», Молдова – Мишел, Қирғизистон – Ҷанета Бобкова ва Украина – гурӯҳи «Real O» иштирок мекунанд.
Созмондеҳи ҷашнвора Вазорати фарҳанги Тоҷикистон буда, хароҷоти баргузории онро Фонди байнидавлатии ҳамкории гуманитарии кишварҳои узви ИДМ ба ӯҳда дорад.
Ҷашнвораи якуми байнулмилалии «Фазои Иттиҳод» моҳи сентябри соли 2010 дар Душанбе доир гардид. Созмондиҳандагони ҷашнвора бар ин назаранд, ки ҷашнвораи мазкур бояд маҳз дар Душанбе баргузор гардад, зеро озмуни «Интервидение. Панҷ ситора» мебоист соли 2009 дар Тоҷикистон баргузор мешуд, вале бинобар ҷой доштани як қатор мушкилоти тадорукотӣ, доир нагардид.
Соли 2008 дар озмуни «Интервидение. Панҷ ситора» Тоҷикистонро Таҳмина Ниёзова намояндагӣ карда соҳиби Шоҳ-ҷоизаи озмун шуд ва тибқи муқаррарот озмуни навбатӣ мебоист дар ватани ғолиб баргузор мегардид.
