Чанде қабл дар ҷамоати водии Язғуломи ноҳияи Ванҷи ВМКБ бо дастгирии Сафорати Ҷумҳурии Кореяи Ҷанубӣ дар Тоҷикистон ва Агентии ҳамкориҳои байналмилалии давлати Кореяи Ҷанубӣ (KOICA) бо ҷалби маблағҳои грантӣ сохтмони НБО-и хурди маҷроӣ оғоз гардид. Хишти аввали сохтмони НБО-и мазкурро Вазири энергетика ва саноати Ҷумҳурии Тоҷикистон Гул Шералӣ гузошт.
Тавре аз хадамоти матбуоти Вазорати энергетика ва саноати ҷумҳурӣ хабар доданд, таҳияи асосноккунии техникию иқтисодии лоиҳаи озмоишии НБО-и хурди маҷроии иншооти мазкур аз тарафи мутахассисони вазорат, ширкатҳои «Дохва Инжиниринг» ва «Экошин»-и Кореяи Ҷанубӣ амалӣ гардид.
Иқтидори лоиҳавии нерӯгоҳи хурд 300 кВт-ро буда, бо мавриди баҳрабардорӣ қарор гирфтани он 309 адад хоҷагиҳои деҳаҳои Мотравн, Шовут, дашти Шовут ва Будун, инчунин ду мактаб, як беморхона ва як кӯдакистон бо нерӯи барқ таъмин мегарданд. Иншооти мазкур, тибқи нақша то охири соли ҷорӣ ба истифода дода мешавад.
Дар маросими оғози корҳои сохтмони нерӯгоҳи хурди барқӣ-обӣ сафири Кореяи Ҷанубӣ дар Ҷумҳурии Тоҷикистон Юон Ҷангу, раиси ВМКБ Қодири Қосим ва директори Агентии Ҳамкориҳои байналмилалии давлати Кореяи Ҷанубӣ (KOICA) Ли Киюнг Санг иштирок намуданд.
Дар ҳамин ҳол, қаблан аз ширкати «Pamir Energy» ба ОИ «Азия-Плюс» хабар дода буданд, ки нерӯгоҳи мазкур аз рӯйи технологияҳои навтарини муосир сохта хоҳад шуд. «Ин нерӯгоҳе хоҳад буд, ки канали дериватсионӣ ё худ нақби обгузар надорад ва бинои нерӯгоҳу тамоми таҷҳизот мустақиман дар болои дарё ҷойгир карда хоҳанд шуд», – гуфта буданд дар ширкат.
Тамоми таҷҳизоти нерӯгоҳ бевосита аз Кореяи Ҷанубӣ оварда шуда, дар давоми сохтмони муштарак бо мутахассисони кореягӣ барои сокинони маҳаллӣ 20 ҷойи нави корӣ фароҳам хоҳад шуд.
Ёдрас мекунем, ки қарори сохтмони нерӯгоҳи хурди барқӣ дар деҳаи Мотравни ноҳияи Ванҷ соли гузашта зимни вохӯрии вазири энергетика ва саноти Тоҷикистон Гул Шералӣ бо мақомоти раҳбарии Агентии ҳамкории байнулмилалии Ҷумҳурии Кореяи Ҷанубӣ (KOICA) қабул шуда буд.
Қобили зикр аст, ки «Pamir Energy» лоиҳаи муштараки ҳукумати Тоҷикистон, Созмони Оғохон оид ба рушди иқтисодӣ (AKFED), Корпоратсияи байнулмилалии молиявӣ (IFC) ва Агентии Швейтсария оид ба рушди байнулмилалӣ буда, арзиши умумии лоиҳа ҳудуди 26,5 млн. доллари ИМА-ро ташкил медиҳад. Аз ин миқдор 10 млн. доллари ИМА ҳиссаи ҳукумати Тоҷикистон аст. Қарордод ба мудати 25 сол ба имзо расида, бо анҷоми он нерӯгоҳ ба моликияти Тоҷикистон мегузарад.
