Чанде қабл дар чаҳорчӯби Барномаи таҳкими ҳамкории Кумитаи имдоди имом Хумайнии Ҷумҳурии Исломии Эрон бо муассисаҳои таълимотии Тоҷикистон дар Донишгоҳи давлатии Кӯлоб вохӯрии раиси намояндагии кумитаи мазкур дар Тоҷикистон ҷаноби Сайидҷаводи Разавӣ бо донишҷӯён баргузор шуд.
Тавре ба ОИ «Азия-Плюс» муовини ректори донишгоҳ оид ба робитаҳои байнулмилалӣ Додарбек Сайдалиев хабар дод, ба вохӯрӣ донишҷӯёне, ки аз Кумитаи имдоди имом Хумайнӣ идрорпулӣ мегиранд, даъват шуда буданд. «Дар вохӯрӣ донишҷӯён дархост карданд, ки ҳаҷми идрорпулии онҳо афзуда шавад ва раиси кумитаи ин хоҳиши онҳоро пазируфт», – гуфт ӯ.
Ба қавли Д.Сайдалиев, Сайидҷаводи Разавӣ ҳамчунин ба кормандони масъули намояндагии кумита дар минтақаи Кӯлоб ҷиҳати таҳияи нақшаи густариши барнома оид ба расонидани кӯмак ба донишҷӯён аз оилаҳои камбизоат супориш додааст.
