Футболбозони навраси тоҷик дар мусобиқоти Чемпионати кушоди Русия оид ба футбол миёни дастаҳои хонаҳои кӯдакон ва мактаб-интернатҳо соҳиби медали биринҷӣ шуд.
Дар шаҳри Сочи мусобиқоти ниҳоии Чемпионати кушоди Русия оид ба футбол таҳти унвони «Оянда ба ту вобаста аст» баргузор гардид. Мусобиқоти мазкур аз ҷониби ширкати «Мегафон» созмон дода шуд.
Дастаҳои Тоҷикистон – ғолибони давраи минтақавӣ аз ноҳияҳои Абдураҳмони Ҷомӣ (гурӯҳи наврасони соли таваллуди 1997-1998) ва Нуробод (наврасони соли таваллуди 1999-2000) бозии хуб нишон дода, ба даври якҳаштфиналӣ роҳ ёфтанд. Сипас футболбозон аз ноҳияи Абдураҳмони Ҷомӣ бо ғолибони ояндаи мусобиқот – дастаи «Каспий» аз Доғистон вохӯрда, ба шикаст мувоҷеҳ гардиданд ва аз иштирок дар даврҳои дигари мусобиқот маҳрум шуданд.
Дастаи футболбозони наврас аз ноҳияи Нуробод пас аз як силсила пирӯзиҳо ба даври нимниҳоии мусобиқот роҳ ёфта, дар бозӣ бо дастаи Абхозистон ба шикаст дучор шуданд. Дар бозӣ барои дарёфти ҷои сеюм бошад, бар дастаи Осетияи Ҷанубӣ дастболо шуда, ба мақоми сеюм ва медалҳои биринҷии мусобиқот сазовор шуданд.
